ഫിഫ റാങ്കില്‍ 2008-നുശേഷം ആദ്യമായി അര്‍ജന്റീന ഒന്നാംസ്ഥാനത്തെത്തി. കോപ്പ അമേരിക്ക ഫുട്‌ബോളില്‍ ഫൈനലില്‍ കടന്നതാണ് മൂന്നാം സ്ഥാനത്തുനിന്ന് ടീമിനെ ഒന്നാമതെത്തിച്ചത്. കോപ്പയില്‍ ചാമ്പ്യന്മാരായ ചിലി പത്തൊമ്പതാം സ്ഥാനത്തുനിന്ന് പതിനൊന്നാം സ്ഥാനത്തെത്തി.അതേസമയം ലോകകപ്പ് യോഗ്യതാറൗണ്ടില്‍ മോശം പ്രകടനം കാഴ്ചവെച്ച ഇന്ത്യന്‍ ടീം 15 സ്ഥാനം നഷ്ടപ്പെട്ട് 156-ാം റാങ്കിലെത്തി.
ലോകചാമ്പ്യന്മാരായ ജര്‍മനി ഒന്നാം സ്ഥാനത്തുനിന്ന് രണ്ടാം സ്ഥാനത്തേക്കിറങ്ങി. രണ്ടാം സ്ഥാനത്തുണ്ടായിരുന്ന ബെല്‍ജിയം മൂന്നാം സ്ഥാനത്തേക്ക് മാറിയപ്പോള്‍ കൊളംബിയ നാലാം സ്ഥാനത്ത് തുടര്‍ന്നു. ഹോളണ്ട് ഒരു സ്ഥാനം മെച്ചപ്പെടുത്തി അഞ്ചാം സ്ഥാനത്തേക്ക് കയറിയപ്പോള്‍ ബ്രസീല്‍ അഞ്ചില്‍നിന്ന് ആറാം സ്ഥാനത്തേക്കിറങ്ങി. പോര്‍ച്ചുഗലാണ് ഏഴാം സ്ഥാനത്ത്. 12-ാം സ്ഥാനത്തുനിന്ന് റുമാനിയ എട്ടാം സ്ഥാനത്തേക്കും 15-ാം സ്ഥാനത്തുനിന്ന് ഇംഗ്ലണ്ട് ഒമ്പതാം റാങ്കിലേക്കുമെത്തി. 22-ാം സ്ഥാനത്തുണ്ടായിരുന്ന വെയ്ല്‍സ് 10-ാം സ്ഥാനത്തെത്തി.
141-ാം റാങ്കില്‍നിന്നാണ് ഇന്ത്യ 156-ല്‍ എത്തിയത്. ഏഷ്യയില്‍ ടീം 28-ാം സ്ഥാനത്താണ്. ലോകകപ്പ് യോഗ്യതാ റൗണ്ടില്‍ ഇന്ത്യയെ തോല്‍പ്പിച്ച ഗുവാം 20 സ്ഥാനം മെച്ചപ്പെടുത്തി 154-ല്‍ എത്തി. ഏഷ്യന്‍ രാജ്യങ്ങളില്‍ 38-ാം സ്ഥാനത്തുള്ള ഇറാനാണ് റാങ്ക് കൂടുതല്‍.
0 comments:
Post a Comment