തോല്‍ക്കുന്ന മെസി, അര്‍ജന്റീന

തോല്‍വികളില്‍ നിന്നാണ് ഏറെ പഠിക്കേണ്ടത്. ജയങ്ങളില്‍ നിന്നല്ല- അര്‍ജന്റീനയുടെയും ചിലിയുടെയും മുന്‍ പരിശീലകനായ മാഴ്സെലോ ബിയെല്‍സ ഒരിക്കല്‍ പറഞ്ഞതാണിത്. തോല്‍വികളെ പുസ്തകങ്ങളാക്കി ചിലി പഠിച്ചു. അര്‍ജന്റീന ഒന്നും പഠിച്ചില്ല. ബ്രസീല്‍ ലോകകപ്പിന്റെ ക്വാര്‍ട്ടര്‍ തോല്‍വിയില്‍ നിന്നായിരുന്നു ചിലിയുടെ തുടക്കം. പക്ഷേ, ഫൈനലില്‍ തോറ്റ അര്‍ജന്റീനയ്ക്ക് ഒരു വര്‍ഷത്തിനുശേഷമുള്ള കോപയിലും കണ്ണീര്‍തന്നെയായി.ഒരു ലോകകപ്പ്, രണ്ടു കോപ അമേരിക്ക.

ഫൈനലില്‍ ജയിക്കാന്‍ അറിയാത്ത ഒരു സംഘമായി അര്‍ജന്റീന മാറി. ഒരു ലോക താരം, ഒട്ടനേകം മികച്ച കളിക്കാര്‍. എന്നിട്ടും അര്‍ജന്റീനയ്ക്ക് കഴിഞ്ഞ 22 വര്‍ഷമായി കിരീടമില്ല. 1993ല്‍ മെക്സിക്കോയില്‍ നടന്ന കോപയില്‍ മെക്സിക്കോയെ തോല്‍പ്പിച്ച് അര്‍ജന്റീന കിരീടം ചൂടി. ഡാനിയേല്‍ പസാറെല്ല, മരിയോ കെംപസ്, ബാറ്റിസ്റ്റ്യൂട്ട, ദ്യേഗോ മാറഡോണ തുടങ്ങിയ കളിക്കാരുടെ കാലഘട്ടങ്ങളില്‍കിരീടങ്ങള്‍ക്ക് ഇതുപോലെ ദാരിദ്ര്യമുണ്ടായിരുന്നില്ല.

1978 മുതല്‍ 1993വരെയുള്ള കാലഘട്ടത്തില്‍ ഓരോരുത്തര്‍ക്കുംകീഴില്‍ ലോകകിരീടങ്ങളും കോപ കിരീടങ്ങളും അര്‍ജന്റീന ഉയര്‍ത്തി. 1978ലും 1986ലും ലോകകപ്പ്, 1990ല്‍ ഫൈനലില്‍ തോറ്റു. 1991ലും 1993ലും കോപ. 1995 മുതല്‍ 2007 വരെയുള്ള ഏഴു അണ്ടര്‍ 20 ലോകകപ്പുകളില്‍ അഞ്ചിലും അവര്‍ ജേതാക്കളായിരുന്നു. 2005ലെ അണ്ടര്‍ 20 ലോകകപ്പ് വിജയം നേടിയ ടീമിലെ ഒമ്പതുപേര്‍ ഇപ്പോള്‍ ടീമിലുണ്ട്. ഫെര്‍ണാണ്ടോ ഗാഗോ, എസ്ക്യൂയെല്‍ ഗരായ്, സബലേറ്റ, ലൂകാസ് ബിലിയ, അഗ്വേറോ, മെസി എന്നിവര്‍. സെര്‍ജിയോ റൊമേറോ, എവര്‍ ബനേഗ, ഡി മരിയ എന്നിവര്‍ 2007 ലോകകപ്പ് ടീമിലുണ്ടായിരുന്നവര്‍. അന്ന് ഗാരി മെദല്‍, മൗറീഷ്യോ ഇസ്ല, അര്‍ട്യൂറോ വിദാല്‍, അലെക്സി സാഞ്ചെസ് എന്നിവരുള്‍പ്പെട്ട ചിലി ടീമിനെ തോല്‍പ്പിച്ചു.

1993ലെ കോപ വിജയത്തിനുശേഷം ആറു ലോകകപ്പും ഏഴു കോപയും കഴിഞ്ഞു. ബാറ്റിക്കും മാറഡോണയ്ക്കുംശേഷം ലോകം കീഴടക്കി താരങ്ങള്‍ വന്നെങ്കിലും കിരീടമെന്ന സ്വപ്നം അകന്നുതന്നെ നിന്നു. 2007ലെ ഫൈനലില്‍ ബ്രസീലിനോട് എതിരില്ലാത്ത മൂന്നു ഗോളിന് അര്‍ജന്റീന തകര്‍ന്നടിയുകയായിരുന്നു. 2011ല്‍ സ്വന്തംനാട്ടില്‍ നടന്ന കോപയില്‍ ഉറുഗ്വെയോട് ഷൂട്ടൗട്ടില്‍ ക്വാര്‍ട്ടറില്‍ തോറ്റു. 1994, 1998, 2002 ലോകകപ്പുകളില്‍ ചലനമുണ്ടാക്കാതെപോയ അര്‍ജന്റീന 2006ല്‍ കുന്നോളം പ്രതീക്ഷയുമായാണ് എത്തിയത്. ഹോസെ പെക്കര്‍മാന്റെ ടീമില്‍ യുവാന്‍ റോമന്‍ റിക്വല്‍മെ എന്ന മധ്യനിരയിലെ പകരംവയ്ക്കാനാകത്ത കളിക്കാരനുണ്ടായിരുന്നു.

മെസിയുടെ അരങ്ങേറ്റം. സെര്‍ബിയക്കെതിരെ 6-0ന്റെ സുന്ദരമായ ജയത്തിനുശേഷം ക്വാര്‍ട്ടര്‍ ഫൈനലില്‍ ജര്‍മനിയോട് തോറ്റു. 80-ാം മിനിറ്റ് വരെ മുന്നിട്ടുനിന്നശേഷം ഗോള്‍ വഴങ്ങി ഷൂട്ടൗട്ടില്‍ തോറ്റു. 2010ല്‍ മാറഡോണയ്ക്ക് കീഴിലെത്തിയ സംഘം അതേ ജര്‍മനിയോട് 4-0ന്റെ തോല്‍വി ഏറ്റുവാങ്ങി ക്വാര്‍ട്ടറില്‍ പുറത്തായി.സുവര്‍ണ സംഘത്തിന്റെ നല്ലകാലം അവസാനിക്കുകയാണ്. 2016ല്‍ കോപ നടക്കുമെന്ന് സൂചനയുണ്ടായിരുന്നെങ്കിലും ഇനിയുണ്ടാകാന്‍ ഇടയില്ല. 2018ല്‍ റഷ്യയില്‍ നടക്കുന്ന ലോകകപ്പാണ് ഇനിയുള്ളത്. ഇതായിരുന്നു അവസരം. പക്ഷേ, അര്‍ജന്റീന ഒരിക്കല്‍ക്കൂടി അവസാനപടിയില്‍ വീണുപോയി.