ലയണല്‍ മെസ്സിയെന്ന താരരാജാവ് വര്‍ഷങ്ങളായി താലോലിക്കുന്ന സ്വപ്നം വീണ്ടും അകന്നുപോയി. രാജ്യത്തിനായൊരു കിരീടം നേടാന്‍ ഒരുവര്‍ഷത്തിനിടെ കളിച്ച രണ്ടാമത്തെ ഫൈനലിലും മെസ്സി പരാജിതനായി. 22 വര്‍ഷത്തെ കാത്തിരിപ്പിന് അറുതിവരുത്തണമെന്ന് തുറന്നുപറഞ്ഞുകൊണ്ടായിരുന്നു താരം ഇത്തവണ കോപ ദിനങ്ങളിലേക്ക് കടന്നത്. ഒരു ഗോളിന് പിന്നാലെയുള്ള മത്സരങ്ങളില്‍ അല്‍പം തിളക്കം കുറഞ്ഞെങ്കിലും പരഗ്വേക്കെതിരായ സെമിഫൈനലില്‍ സാക്ഷാല്‍ മെസ്സിയെ കണ്ട് ആരാധകര്‍ കോരിത്തരിച്ചു. ഫൈനലിലും ആ മെസ്സി മാജിക്ക് കാണാന്‍ കാത്തിരുന്നവര്‍ക്ക് തലകുനിച്ച് മടങ്ങുന്ന അര്‍ജന്‍റീന നായകനെയാണ് കാണാനായത്.
ഷൂട്ടൗട്ടില്‍ കിക്ക് ലക്ഷ്യത്തിലത്തെിച്ച ഒരേയൊരാളായിട്ടും പഴി മെസ്സിക്ക് നേരെതന്നെയാണ്. മെസ്സിയെ പോലൊരുതാരം 63 തവണ മാത്രമാണ് ഫൈനലില്‍ പന്ത് തൊട്ടതെന്നത് കണക്കിലെടുക്കുമ്പോള്‍തന്നെ മനസ്സിലാകും അര്‍ജന്‍റീന സാന്‍റിയാഗോയില്‍ അനുഭവിച്ചത്. ഗോള്‍മുഖത്തേക്ക് മെസ്സിയുടെ പ്രവേശംതന്നെ അപൂര്‍വമായിരുന്നു. കോപയിലും പരാജയപ്പെട്ടതോടെ എക്കാലത്തെയും മികച്ചവരുടെ കണക്കില്‍ മെസ്സിയെ മുന്‍നിരയില്‍ പ്രതിഷ്ഠിക്കുന്നത് സംബന്ധിച്ചുള്ള തര്‍ക്കങ്ങള്‍ വീണ്ടും തലപൊക്കി. രാജ്യത്തിനായി ലോകകപ്പുകള്‍ സമ്മാനിച്ച പെലെക്കും മറഡോണക്കും ഒപ്പം താരതമ്യം പോലും വേണ്ടെന്ന് വാദിക്കുന്നുണ്ട് പലരും.
ഫൈനലില്‍ മെസ്സിയുടെ സഹോദരനുള്‍പ്പെടെ കുടുംബാംഗങ്ങള്‍ ഗാലറിയില്‍ ചിലി ആരാധകരുടെ ആക്രമണത്തിനിരയായി എന്നസംഭവം കൂടിയായപ്പോള്‍ താരത്തിന് പൂര്‍ണമായും വേദന സമ്മാനിച്ചാണ് ഇത്തവണ കോപക്ക് അന്ത്യമായത്.
0 comments:
Post a Comment